Viðhaldsbók fjórða hreyfils flugvélarinnar TF-ISU, sem var í eigu Flugfélags Íslands. Hún var af gerðinni Vickers Viscount 759D og var nefnd Hrímfaxi. Flugvélin var smíðuð árið 1956, framleiðslunúmer 149. TF-ISU var skráð á Íslandi 11. apríl 1957. Hún fórst í aðflugi að Fornebu-flugvelli í Osló þann 14. apríl 1963. Allir um borð létust, 7 farþegar og fimm manna áhöfn.

Bókin er grá að lit með grábláum kili og á miðri kápunni stendur: „Engine Log Book”. Á bókina er handskrifað: „TF-ISU”, „#4”, „Rolls Royce Dart 510-60 s/n 5024”.

Fyrsta færsla bókarinnar er skráð 7. júní 1956 og sú síðasta 27. júní 1962. Bókin er fyrri af tveimur viðhaldsbókum hreyfilsins sem eru í varðveislu Flugsafnsins. 

Flugfélag Íslands var stofnað á Akureyri 3. júní 1937, og hét upphaflega Flugfélag Akureyrar. Nafni félagsins var breytt í Flugfélag Íslands þann 13. mars 1943 en það var þriðja félagið með því nafni. Flugfélag Íslands og Loftleiðir sameinuðust árið 1973 undir nafninu Flugleiðir, síðar Icelandair.