Logbók Jóns Þ. Ísakssonar flugmanns og flugumferðarstjóra. Bókin er dökkblá að lit og á henni stendur: “Transport Pilot Log”. Bókin er merkt Jóni ásamt helstu upplýsingum. Fyrsta færsla bókarinnar er skráð 22. júlí 1946 og sú síðasta 30. júlí 1949. Þann 11. ágúst  1948 er fyrsta flug hans hjá Loftleiðum skráð þegar hann flaug TF-RVK frá Reykjavík til Þingeyrar.

Jón Þórmundur Ísaksson fæddist 28. febrúar 1927 í Vestmannaeyjum, hann lést 14. maí 2015. Í æviágripi Jóns sem birt var í Morgunblaðinu 22. maí 2015 segir: „Jón stundaði svifflugsnám og hóf síðan flugnám hjá Flugskóla Akureyrar á Melgerðismelum í Eyjafirði og lauk sólóprófi árið 1946. Hann fór í framhaldsnám til Spartan School of Aeronautics í Tulsa, Oklahoma, og lauk atvinnuflugmannsprófi þar í árslok 1947 og blindflugsprófi í maí 1948. Við heimkomuna var Jón ráðinn flugmaður hjá Loftleiðum og starfaði þar til ársins 1953, er hann hóf nám og störf hjá Flugmálastjórn. Jón lagði stund á og lauk grunnnámi og ýmsu sérnámi í flugumferðarstjórn og starfaði lengst af sem varðstjóri í flugturni Reykjavíkurflugvallar. Hann lét af starfi í árslok 1990.”  Flugmannsskírteini Jóns var númer 86.