Kortasleði, svokallaður greiðslukortaposi, fyrir kreditkort. Notaður til að þrykkja upplýsingar af kreditkortum yfir á greiðslunótur. Slíkir sleðar / posar voru notaðir frá því að kreditkort komu á markaðinn sem greiðslumöguleiki á Íslandi í kringum 1980. Slíkir handvirkir posar eru nú orðnir mjög sjaldséðir þar sem rafrænar vélar hafa svo að segja alfarið tekið við af þeim. Sleðinn er merktur VISA. Plastspjaldi með nafni og númeri fyrirtækis var komið fyrir í posanum, greiðslukortinu smellt í þar fyrir ofan og greiðslunótan, með handskrifuðum upplýsingum á, lögð þar yfir. Sleðanum var svo rennt yfir, fram og til baka, og þrykktust þá upplýsingarnar af spjaldinu og greiðslukortinu á nótuna. Á spjaldinu, sem er gult á lit, má sjá að þessi posi hefur verið notaður á Keldum á Rangárvöllum, húsi í húsasafni Þjóðminjasafnsins. Posinn er í mjög góðu ástandi.
Það var Þorvaldur Böðvarsson, fagstjóri skráningar í Þjóðminjasafninu, sem kom með posann frá skrifstofum safnsins.